2020 MTCI Planu Master Plan Foka Liu Ba Região Tolu

0
169

   Ministeriu Turizmu Comerçio e Industria (MTCI), salienta katak planu 2020 nia prioridade mak sitius turistikus sira ne’ebe boot iha região tolu (3), Sentral, Leste, no Oeste.

  “2020 MTCI planu ona foka liu master plan iha região tolu, sei preve osan ho montante 1, 7 millaun ba deit master plan tanba foin primeira vez governu investe”, dehan Diretor Geral MTCI, Jose Quintas. Nia hatutan mos, região tolu mak Sentral, Leste ho Oeste, tanba kada município iha rejiaunm ida-idak refere, MTCI identifika ona ninia ikon ka sitius turizmu importante, porezemplo Dili nia Cristu Rei, Maliana nia Be’e Marobo, no Ainaro nia Nain Feto Ramelau.

   “Ministerio nia planu estratejika iha 2030 setor turizmu sai hanesan setor importante ba ita nia ekonomia nasaun nian tanba ita la bele depende deit ba mina maibe ita mos diversifika ita nia ekonomia liu husi setor turizmu, agrikultura, peska no manufatura,” nia haktuir. Nia dehan, 2020 setor turimu iha Timor-Leste bele lao ona ba oin tanba VIII Governu tau prioridade liu ba setor turizmu no durante ne’e sitius turistikus iha municipio sira abandona no governu hakarak dezenvolve maibe kestaun osan. “2020 ita bele koalia konaba turizmu iha Timor-Leste tanba intermu ba osamentu mos komesa sae, tanba ita koalia konaba turizmu laos koalia deit maibe presiza investe,” dehan nia.

  Iha parte seluk, Vice President Turismu e Ambiente, iha Camara Comercio no Industria Timor-Leste (CCITL), Custodio Jose Lopes, katak turizmu sai alvu prioridade estratejia iha area ida ne’ebe presija dezenvolve atu hasae kresimentu ekonomiku nasional no diversifika ekonomia. “Parte interesante turizmu sira iha Timor-leste ami aprezenta ona ba excelentisimo Primeiru Ministru Timor-Leste nota konseitu ida konaba barreira dezenvolvimentu turizmu Timor-Leste nian.

  Ami indetifika barreira importante sanulu resin ida (11),” nia hatete. Nia dehan, barreira 11 mak kompetividade iha setor turizmu, assesibilidade, vistu, joventude no emprego, kualidade produto no diversidade, kapasidade no kualidade servisu iha turizmu, visaun lideransa no parseria, planu analiza estatistika, bankaria no pagamentu, konservasaun mariña, no protesaun area terrestre, ho protesaun seguransa no prosperidade ba turizmu. “Hau hanoin bainhira bareira sira ne’e responde didiak, turizmu iha Timor bele sai industria exporta kompetitiva importante ida iha Timor-Leste. Governu tenki hasae fundu ka orsamentu ba setor turismu nian,” tenik nia.

  Tuir Membro Parlamentu Nasional, Deputadu Antoninho Bianco Timor-Leste iha potensial boot ba setor turizmu maibe governu presisa hadia infra-estrutura hanesan estrada, fatin istoriku, toba fatin, no seluk tan.“Turismu iha Timor-Leste potensial ne’ebe boot, ne’ebe governu tenki iha vontade hodi kria kondisaun hodi atrai ema turista sira ba visita.

  Durante ne’e ita nia ministru troka ba troka mai osan kada tina-tinan aprova mais resultado seidauk,” nia hatete. Nia salienta katak konaba setor turizmu iha Timor-Leste, iha potensial boot no karik governu investe didiak setor turizmu bele fo benefisiu diak ba povu ho nasaun no katak fatin istoriku mos bara-barak maibe iha deit du’ut laran hanesan Ramelau, Kablaki, Matebian no mos fatin seluk.

Fontes: The Dili Weekly

HUSIK RESPOSTA