Feto Involve Iha Servisu Agrikultura Ajuda Laen Asegura Aihan Ba Familia

0
142
Kordenadora Jeral Programa MOKATIL, Paula Corte Real hateten preokupasaun ne’ebe agrikultor sira infrenta maka ekipamentus, liu-liu tratores atu ajuda fila rai.
     
   Feto Agrikultora husi Munisipio Aileu, Celestra Fatima hateten feto nia involvimentu iha setor agrikultura ho intensaun ajuda laen sira hodi fortifika produsaun no asegura aihan ba familia. Nia dehan feto sira seidauk hanoin atu dezenvolve agrikultura ida ne’ebe ho eskala bo’ot ba merkadu tanba sistema agrikultura ne’ebe sira implementa sei tradisional entau presiza forsa ema nian. “Hau mos feto ida ne’ebe involve an iha vida agricultura. Hanesan inan ida hau ajuda aman sira fortifika produsaun ba produtu ne’ebe ita halo,” nia hateten bainhira halo dilaogu ho Membrus Parlamentu sira iha Timor Plaza, Dili.
   Nia dehan problema ne’ebe feto agrikultor sira infrenta maka menus ekipamentus atu fasilita feto sira halo servisu agrikultura ho eskala bo’ot. Nia informa agora dadaun projetu Avansa Agrikulturam ho fundus husi USAID, halao inisiativa ida katak projeitu tau osan sorin no agrikultor sira sorin hodi sosa ekipamentus agrikultura atu fasilita servisu ho efetivu no efisente liu tan.
   Entertantu, Kordenadora Jeral Programa Movimentu Kamponezes Timor-Leste (MOKATIL), Paula Corte Real hateten preokupasaun ne’ebe agrikultor sira infrenta maka ekipamentus, liu-liu tratores atu ajuda fila rai. Nia fo ezemplu grupo agrikultor sira ne’ebe hamahan an iha MOKATIL, iha rai 700 hektares iha teritorio tomak atu kuda produtu oioin, maibe laiha ekipamentus ida ne’ebe bele hakaman sira nia servisu. “Tratores ne’ebe governu apoiu maioria kondisaun a’at, entau labele ajuda sira koa rai,” nia hateten.
   Nia dehan feto nia involvimentu iha setor agrikultura ne’e iha no sira halao servisu ne’ebe hanesan ho mane sira, maibe tuir kibi’it no forsa ne’ebe feto iha tanba servisu hotu sei tradisional. Iha parte seluk, Presidente komisaun D, asuntu ekonomia e dezenvolvimentu, Deputada Virgina Ana Belo hateten feto nia involvimentu iha servisu agrikultura iha, maibe ki’ik tanba feto iha papel importante seluk ne’ebe tenke halo hanesan servisu uma laran. “Forsa intermus fisiku ladun makas, entau dala barak sira produs ba sira nia familia. Laiha pensamentu ida atu faan ba merkadu bo’ot, maske sira faan oituan tau iha uma oin sira,” nia hateten.
   Nia dehan esforsu hotu governu halo hodi fo asistensia ba agrikultor sira, liu husi fo tratores, adubu no fini, maibe presizamente haforsa iha sistema kontrolu atu apoiu sira ne’e bele fasilita duni agrikultor sira hodi hasa’e produsaun. Alende ne’e nia dehan governu, liu-liu ministerio relevante sira tenke servisu hamutuk hodi prepara merkadu ida ne’ebe dignu no justu ba produtor sira tanba ho ida ne’e maka bele motiva agrikultor sira servisu bandinas liu tan.
                      Fontes: The Dili Weekly                   Tr.: Hallo.tl  

HUSIK RESPOSTA