Governu gasta milhoens 2 USD ba lixu

Lixu ne’ebe naklekar iha Dili laran, obriga Governu kontrata kompanhia sira hodi hamos no foti ba soe iha lixeira. Husi maneira ne’e Governu tenki gasta

0
121

Lixu ne’ebe naklekar iha Dili laran, obriga Governu kontrata kompanhia sira hodi hamos no foti ba soe iha lixeira. Husi maneira ne’e Governu tenki gasta milhoens 2 USD tinan-tinan hodi selu kompanhia sira foti lixu.

“Tinan-tinan ita gasta osan ba deit lixu nian hamutuk 2 milhoens, osan sira ne’e hodi aluga kareta, selu ema sira dasa foer, selu sira tula foer, kombustivel nune’e mos preukupasaun seluk tan ne’ebe mak presija,” hateten Ministru Koordenador Estado Asuntu Administrasaun e Justisa no Ministru Administrasaun Estatal, Dionisio Babo Soares ba jornalista sira iha ninia serbisu fatin, Colmera, Dili, Kuarta (04/01/2017).

Governu kontrata kareta pribadu ne’ebe durante ne’e tula foer r hamutuk 40, kareta Estado iha 20 resin, kareta sira ne’ebe aluga ho presu US$ 65-US$ 70.00 ne’ebe loron ida sira tenki rekolha lixu dala tolu.

“Ema sira ne’ebe ra’ut foer, dasa rai iha estrada ninin mos tenke selu, rekolha lixu ne’e lor-loron, los duni gasta osan boot tebes,” dehan Ministru Dionisio.

Mnisteriu Administrasaun Estatal kria ona dekretu lei ida, ne’ebe mak hetan ona promulgasaun husi Prezidente Republika, Taur Matan Ruak, katak populasaun sei selu ba foer ne’ebe mak iha liu husi sosa pulsa ba elektrisidade ninian.

“Estatal nia serbisu hare mos ba area urbana, ne’ebe hahu agora ba oin, selu ona lixu, ne’e ami halo Sistema ida liu husi pulsa elektrisidade, ne’ebe kuandu selu pulsa, US$ 1.00, tenke selu tan US$ 0,10 centimus, ne’e ba iha lixu ninian, kuandu ema ne’ebe halo negosio entaun US$ 0,25 centimus, kompanhia boot US$ 0,50 centimus, ne’ebe hahu agora sidadaun tenke kontribui, tanba kada tinan gasta osan boot teb-tebes ba lixu,” Dionisio esplika.

Governu mos haree katak maioria komunidade iha Dili laran la iha konsensia koida ida-idak nia ambiente no soe foer arbiru deit.

“Problema agora la’os urbana, maibe mota, hanesan iha mota Comoro, Bairo Pite no Taibesi ninian, ne’e tanba komunidade lori foer ba soe iha mota nia ulun entaun udan mai lori foer sira butuk iha fatin ida entaun hamosu inundasaun,” hateten Dionisio.

Iha parte seluk, Ministru Koordenador ne’e mos dehan katak, oras ne’e dadauk Governu liu husi MAE halo ona dekretu lei no hodi ba deskute hamutuk iha Konselho ministrus, dekretu lei atu regula ba kareta sira ne’ebe mak para iha fatin publiku tenke selu.

“Kuandu dekretu lei ne’e aprova no hetan tiha aprovasaun husi Prezidente republika no publika iha jornal da republika entaun aplika ona hodi aplika ba kareta sira ne’ebe mak para atu selu multa, kada kareta ida sei multa 10 centavus, Governu kria regulamentu ne’e hodi nune’e bele hatama mos reseitas ba Estado,” Dioniso esplika.

Oras ne’e dadauk dekretu lei kona ba selu lixu hetan ona aprovasaun husi PR Taur, ne’ebe regulamentu ne’e aplika iha tinan 2017. Dekretu lei para kareta sei multa agora deskute hela iha KM. mia

HUSIK RESPOSTA