Governu sei hatama sinal lian Tetum ba iha Eskola Publika

Governu Timor-Leste liu husi Ministeriu Edukasaun Juventude no Dezportu (MEJD) indika sei inklui sinal lian Tetum iha eskola publika hanesan parte ida husi atividade aprendizajen, tamba timor oan barak mak koalia Tetum.

0
173

Ministra Edukasaun, Dulce de Jesus Soares hatete Timor-Leste uza sinal lian oin-oin iha eskola hodi fo apoiu ba ema ne’ebe iha problema ho tilun (di’uk), liu-liu ba eskola privadu, maibe laiha ida mak uza iha eskola publika.

“Ha’u hatene katak ami seidauk iha sinal lian Tetum iha eskola publiku. Tan ne’e Ministeriu intende atu aumenta treinamentu sinal lian Tetum ba eskola publika,” nia hatete foin lalais ne’e iha Dili.

Nia hatete sinal lian ne’e uza iha Timor-Leste laos iha lian Tetum, maibe lian estranjeiru, tan ne’e MEJD, Ministeriu Sosial, Solidariedade no Inkluzaun (MSSI) ho apoiu husi Embaixada Australia sei hatama sinal lian Tetum iha atividade aprendizajen iha eskola.

Nia aumenta katak, Ministeriu mos servisu ho eskola privadu ne’ebe uza sinal lian hodi oferese mos ba eskola publiku.

“Ita nia oan balun iha problema ho sira nia tilun, maibe mestre/mestra sira la fo asaun ne’ebe espesial bazeia ba sira nia nesesidade. Ami desidi ona katak sinal lian ne’ebe diak hodi hanorin iha eskola maka sinal lian Tetum, tamba maioria komunidade Timor-Leste koalia ho lian Tetum, fasil hodi uza,” nia hatete.

Nia aumenta MEJD no MSSI halo komitmentu hodi fo treinamentu sinal lian Tetum ba mestre/mestra ho nune’e sira bele hanorin fali estudante sira ne’ebe ho nesesidade espesifiku.

Aleinde ne’e, Xefi Departamentu Edukasaun Inklusivu iha MEJD, Jose Monteiru hatete Timor-Leste seidauk iha sinal lian ne’ebe ofisial ka nasional no ida ne’e presiza atu hili sinal ne’ebe lo’os hodi uza iha eskola.

“Sinal lian ne’ebe uza, atu uza ba estudante ne’ebe iha problema ho sira nia tilun (diuk), no to’o agora, sinal lian ne’ebe atu uza seidauk identifika,” nia hatete.

Nia hatete, sinal lian uza ona iha Timor-Leste dezde okupasaun Indonesia maibe sei kahur, tan ne’e governu agora hili ona sinal lian Tetum.

Enkuantu ne’e, Ministeriu MSSI, Armanda Berta dos Santos hatete sira servisu ho Ministeriu Edukasaun oinsa hatama Sinal lian iha eskola publika.

“Ema hirak ne’ebe ho dizabilidade iha direitu hanesan ho sidadun sira seluk, tan ne’e Ministeriu foka ba ema sira ne’ebe ho nesesidade espesifiku. Ministeriu apoiu ona programa Bolsa da Mãe no fo apoiu seluk ba sira ne’ebe ho nesesidade espesifiku” nia hatete.

Nia hatete bazeia ba sensus familia 2015 iha ema hamutuk 58.000 ho tipu dizabilidade oin-oin iha Timor-Leste.

“Ami sei servisu hamutuk bazeia ba ami nia papel rasik hodi dudu prosesu dezenvolvimentu inklusivu ba kualidade no justamentu, hodi fo posibilidade ba  komunidade hotu hetan moris ne’ebe diak no simu hahalok ne’ebe hanesan hodi asesu ba edukasaun. Maibe, ami tenki hatene metodu ne’ebe ezatu hodi hanorin estudante ne’ebe ho dizablidade, tamba sinal lian  bele apoiu ba estudante sira ne’ebe iha problema ho tilun (diuk), ” nia hatete.

Fontes : The Dili Week 

Tr. : Hallo.tl

 

HUSIK RESPOSTA