Indonézia prepara hela kandidatura ba observador CPLP nian

0
98

Indonézia prepara hela nia kandidatura hodi sai membru observador hosi Komunidade Nasaun sira Lian Portugeza (CPLP), hatete hosi embaixador indonéziu iha Lisboa, Ibnu Wahyutomo, ba ajénsia Lusa.

“Ha’u hetan instrusaun hodi prepara dala hodi nune’e Indonézia bele sai hanesan membru observador CPLP nian”, hatete hosi Ibnu Wahyutomo, hodi adianta katak hasoru malu ona ho sekretáriu-ezekutivu hosi organizasaun, Francisco Ribeiro Telles, hodi hahú prosesu.

Diplomata indonéziu iha Portugal defende ona importánsia hosi adezaun ne’e ba komunidade luzófonu hodi reforsa koperasaun trilateral hosi nasaun ne’e ho Portugal ho Timor-Leste.

“Bainhira ami adere ba CPLP, nu’udar observador, sei hanesan fásil liu iha apoiu hosi nasaun sira seluk hosi komunidade nian, liuliu hamutuk ho organizasaun internasional sira seluk. Sei hanesan benéfiku ba Indonézia”, nia konsidera.

Ibnu Wahyutomo, ne’ebé iha Portugal tinan ida resin, ko’alia ba ajénsia Lusa iha ámbitu hosi pasajen tinan 20 hodi hahú hikas relasaun diplomátiku sira entre Portugal ho Indonézia iha ámbitu hosi prosesu ne’ebé hamosu ona realizasaun hosi referendu kona-ba autodeterminasaun Timor-Leste nian.

Embaixador Indonézia nian subliña mós importánsia hosi Portugal hanesan parseiru diplomátiku.

“Ami haree Portugal hanesan nasaun importante ida ne’ebé ami tenki iha relasaun iha ámbitu hosi ideia koperasaun trilateral ida entre Portugal, Timor-Leste ho Indonézia, maibé mós tanba nia pertense ba Uniaun Europeia”, nia hatete.

Liutiha tinan 24 relasaun ne’ebé hakotu tanba kestaun Timor-Leste nian, Portugal loke seksaun ida hosi interese sira iha Jakarta, iha tiann 1999, no loke hamutuk reprezentasaun hanesan ida hosi Indonézia iha Portugal.

Harii iha tinan 22 liubá, CPLP agora daudaun iha Estadu-membru sia: Angola, Brazil, Cabo Verde, Guiné-Bissau, Guiné Ekuatorial, Mosambike, Portugal, São Tomé & Prínsipe ho Timor-Leste.

Organizasaun iha observador asosiadu hamutuk 19: Hungria, Repúblika Xeca, Eslovákia, Uruguai, illa Maurísia, Namíbia, Senegal, Turkia, Japaun, Jeórjia, Luxemburgu, Andorra, Reinu Unidu, Arjentina, Sérvia, Xile, Fransa, Itália ho Organizasaun hosi Estadu sira Ibero-Amerikanu ba Edukasaun, Siénsia ho Kultura (OEI).

Fontes : SAPO NOTISIA

LEAVE A REPLY