“Ita Tenke Dignifika no Valoriza Turizmu ho Limpeza”

0
332

DILI, (TATOLI) – Estudante no universitáriu sira kontinua preokupa ho lixu ne’ebé sei namkari iha kapitál Díli mezmu ekipa Servisu, Agua no Saneamentu (SAS) halo limpeza lorloron. Tanba ne’e, sujere ita hotu atu kontribui ho soe lixu iha nia fatin hodi dignifika no valoriza setór turizmu Timor (TL) nian.

Júlio de Andrade, estudante Universidade Oriental Timor Lorosa’e (UNITAL) subliña katak nu’udar sidadaun tenke kontribui ba ita-nia nasaun atu nune’e nasaun sai furak iha mundu.

“Ho atividade limpeza mak bele dignifika no valoriza setór turizmu iha Timor-Leste hodi bele kontribui retornu ba kofre estadu. Momentu hanesan ne’e, ita halo limpeza atu ita ne’ebé lorloron iha ne’e, bele tau lixu iha nia fatin. Nune’e mós hanesan joven, presiza mós halo kontribuisaun ba ita-nia rain,” dehan estudante Julião de Andrade, ba jornalista sira, iha Largo Lecidere-Díli, ohin.

Iha fatin hanesan, Alfredo Batista, estudante ida mós akresenta katak ita tenke kuidadu ita-nia ambiente atu moos no saudável.

“Lorloron ita haree iha mídia sosiál dehan kapitál (Díli-red) ne’e fo’er hela de’it, ita tuur iha fatin, interpreta de’it, ita hanesan ajente kontrolu sosiál no ajente transformadór ita tenke kontrola atu labele so’e lixu,” dehan estudante Alfredo Batista.

Iha fatin ketak, estudante Fakuldade Medisina Siénsia no Saúde (FMSS), UNTL, Agina Diana Ribeiro, antes ne’e, hateten katak ambiente nu’udar fatór báziku tan ne’e limpeza importante tebes. “Limpeza nu’udar evidénsia (….) hadomi ambiente,” tenik estudante Departamentu Nutrisaun ne’e.

Nune’e mós, Alumni Fakuldade Filozofia, Universidade Nasionál Timor Lorosa’e (UNTL), Januário Freitas Pinto, antes ne’e, sujere ba governu, liliu Sekretáriu Estadu Meiu Ambiente (SEMA) atu kria lei ka regulamentu rigorozu  kona-ba la soe fo’er arbiru, nune’e se ema ruma mak soe fo’er arbiru tenke simu sansaun.

“Tetu atu reduz mós importasaun sira ne’ebé mak kontribui maka’as ba lixu, ezemplu hanesan akua, rebusadu no seluk tan. Ba timoroan sira ne’ebé mak fa’an sasan inklui xinez, favor ida! Loja ka kioske oin, la presiza ita-nia pesoál jestaun lixu ka ekipa saneamentu mak hamoos. Idaidak hanoin atu hamoos rasik aredór hirak ne’e,” alumni UNTL, Januário Pinto fó hanoin.

Entretantu, antes ne’e mós, governu liuhusi Ministériu Komérsiu, Indústria no Ambiente (MKIA), Diresaun Nasionál Protesaun Biodiversidade, fó atensaun ba sidadaun hotu, tuir dekretu lei nú. 26/2012 lei baze ambientál artigu 7 (Sidadaun nia dever), kódigu penál 215 (Contra o ambiente), kódigu 217 (Contra flora e fauna) husu ba publiku atu labele soe sigaru rohan ne’ebé lakan hela husi kareta, motor ka transporte públiku.

Tuir mai, labele halo atividade sunu rai, halo to’os iha área subaun boot ka área sira besik subaun, labele tau ai-kose iha du’ut maran leten.

Labele soe lixu hanesan tisu, plástiku, masa mamuk, kaixa mamuk falun hahan nomós labele soe botir rahun hanesan serveza, kratingdaen nomós botir seluk tanba manas bele sunu du’ut maran.

Inklui, husu kolaborasaun sidadaun sira nian hodi kontribui hahalok pozitivu sira hodi asegura ambiente liliu biodiversidade Timor-Leste nian.

“Ita halo mós advokasia ba iha komunidade sira nomós ba juventude sira hodi ajuda halo no kontribui mós ”afirma Diretór Diresaun Nasionál Protesaun Rekuperasaun Biodiversidade (DNPRB), Rui dos Reis Pires, ba jornalista sira, ohin, iha Knua Juventude Fila Liman, Pateo-Díli, hafoin partisipa “Inspirational Talkshow” kona-ba Promove Dame Liuhusi Konserva Biodiversidade iha Timor-Leste.

Diretór ne’e informa governu katak koopera ona ho kompañia balun no fó apoia ona ba sira para halo redusaun ba plástiku sira. “Karik botir ka masa sira bele halo transformasaun fali ba masa kuru bee, vazu ba ai-funan no seluk tan,” informa Diretór Rekuperasaun Biodiversidade, Rui dos Reis Pires.

Diretór DNPRB ne’e informa mós katak tuir polítika governu nian agora mak reduz lixu to’o zero. “Signifika katak ita tenke hapara ona importasaun plástiku. Depois ema hotu ba kompras aihan ka buat ruma iha loja, lori bote. Agora lae, entaun ita tenke buka meius halo nusa mak reduz plástiku sira,” realsa diretór Ruis dos Reis Pires.

Fontes: Timor Agora

HUSIK RESPOSTA