Kultura Mak Ha’u nia Identidade”

0
9865

Kultura mak ha'u nia identidade. Lia-fuan hirak ne'e konhesidu tebes iha ita nia vida kulturalmente iha nasaun foun Timor Leste. Dala barak termos ida ne'e ita bain-bain ita ko'alia iha ita nia vida moris maibe susar atu implementa tuir kultura Timor nian, Tanba sa? Pergunta bo'ot mai ita hotu atu hanoin.

Iha tempu antes Nasaun Portugal mai ukun ita nia nasaun Timor Lorosa'e, rai Timor Lorosa'e forte iha nia lisan kulturalmente animisme hodi adora fatuk lulik ai-lulik no be'e-lulik. Tan Bei'ala sira seidauk hatene koba ba relijiaun.

Depois ho ida ne'e portugal tama mai Timor Lorosa'e malae mutin sira hahu ona fo hanorin sira nia relijiaun katolika ba ita nia Bei'ala sira. Ba sira ne'ebe jentiu hetan sarani husi be'e Batismo tuir malae mutin sira nia kultura relijiaun nian.
Antigamente Povu Timor moris ho kultura tradisional, ai-moruk mos Bei'ala sira uja ai-kulit hodi kura moras, tan la iha hospital hodi sira hetan tratamentu saude.
Moris hanesan povu agrikultura, moris loron-loron hanesan ba to'os no natar hodi serbisu buka moris ba hahan kabun laran nian no sustenta familia.
Bei'ala sira nia kultura hatais roupa mak hakfolik deit. Feto sira uja tais feto,no mane sira uja tais mane. Maibe inan feton sira nia serbisu iha uma hein labarik,soru-tais, fai-batar,fai-hare, prepara hahan ba sira nia laen kaben ne'ebe mak ba serbisu iha to'os no natar.
Iha tempu okupasaun Indonesia nian, feto Timor barak mak hatene ona buka idak-idak nia moris iha sidade laran. Balun hahu ona sira nia moris hanesan fula-liman ka fa'an sasan iha merkadu, no iha ona mudansa ba sira nia hatais hodi modifika sira nia-an, hatene ona hatais kalsa naruk no vestidu.
Oras ne'e dadaun Timor ukun rasik-an ona, nasaun barak mak mai visita rai Lulik Timor Lorosa'e, estranjeirus sira lori sira nia kultura molik mai hatudu ba povu Timor. Jerasaun foun sira aplika tuir modelu ema estranjeirus sira nian, hodi haluha tiha kultura Timor nian, inan feton barak mak hatais roupa husar sai, kalsa badak, no vistidu badak. Atetude ne'e hatudu ba jerasaun tuan sira iha ne'ebe hela iha foho hodi konta fali sira nia vida moris iha tempu nakukun nia laran. Dala ruma jerasaun tuan sira hatete nune'e " ami uluk moris iha nakukun laran buat modelu ami lahatene, maibe tempu agora jerasaun foun sira hatudu sira nia modelu liu husi imi nia hatais aplika tuir ema malae nian, kelen sai husar sai"
Realidade hatudu katak bainhira jerasaun foun sira ferias ba Distritu no Sub-Distritu, Sira hatudu lo'os buat ne'ebe sira aprende iha sidade laran.

Nu'udar ema Umanu ida, ita tenki moris tuir idak-idak nia kultura, no ita nia nasaun mos iha kultura ne'ebe sei forte no maka'as, bele aplika ema seluk nia kultura maibe hare mos ita nia identidade kultura ne'ebe sei forte.

Delfina da costa pereira

HUSIK RESPOSTA