MAP : Fatin ba Oho Animal nian Laiha

0
101

Diretora Nasional Veterinaria Ministeriu Agikultura no Peskas (MAP), Joanita Bendita da Costa hatete nia la garantia na’an fahi ne’ebe fa’an iha merkadu nia kualidade no seguru, tamba laiha fatin ba animal ne’ebe oho, hodi halo inspesaun ba na’an fahi antes tama ba merkadu.

Nia hatete importante tebes iha fatin ne’ebe diak no rekursus umanu ne’ebe adekuada hodi halo inspesaun ba produtu na’an hotu antes tama ba iha merkadu, tamba sira bele lori moras barak no bele estraga komunidade nia saude.

Nia konfesa katak industria produtu na’an fahi iha Timor-Leste sei ki’ik maibe kompania barak mak halo investimentu ba reprodutor fahi.

“Ha’u labele dehan katak na’an fahi ne’ebe fa’an iha merkadu seguru ka lae, maibe ha’u hakarak aumenta katak bazeia ba protokolu fahi tenki oho iha fatin oho fahi nian depois distribui fali ba merkadu. Maibe fahi oho iha fatin-fatin,” nia hatete.

Nia hatete ema balun iha kapasidade ne’ebe diak hodi oho fahi bazeia ba padraun higiene no sanitasaun, maibe animal balun moras.

Nia preokupa ho problema ida ne’e, tamba komunidade ladun iha konesimentu kona problema saude komunidade nian ne’ebe kauza husi produtu animal.

Enkuantu ne’e, Dosente Fakuldade Veterinaria iha Universidade Nasional Timor Lorosa’e (UNTL), Acacio da Cruz Amaral hatete durante Independensia tinan 17, Governu hari’i deit fatin oho animal nian ida, lokaliza iha Tibar, la funsiona ho diak.

Nia hatete katak Ministeriu treinu rekursus umanus atu inspeta no analiza moras ne’ebe kauza husi produtu na’an, maibe presiza kria kondisaun ne’ebe diak atu nune’e servisu ida ne’e bele la’o ho diak.

“Fatin ba oho animal ne’ebe laiha, sai problema. Ami iha deit fatin oho animal nian ida iha Tibar, maibe la funsiona ho diak. Governu presiza tau atensaun no dezenvolve tiha, tamba kompania barak mak investe ba area ida ne’e,” nia hatete.

Fontes : The Dili Weekly

Tr. : Hallo.tl

HUSIK RESPOSTA