MAP Propoin Aumenta Millaun Rua Ba Orsamentu Geral 2019

0
253

DILI, (TATOLI) – Ministériu Agrikultura no Peska (MAP) simu tetu fiskál 2019 ho totál millaun $11 resin, maibé tanba iha programa balun ne’ebé seidauk bele halo ho montante orsamentu ne’e maka propoen tan aumentu millaun rua.

Ministu Agrikultura no Peska, Joaquim José Gusmão dos Reis Martins, hatete tetu ne’ebé fó menus uitoan kompara ho osan 2017 nian, maibé MAP tenta halo ezersísiu ho montante ne’ebé maka iha.

“Ami haree ba programa balun seidauk bele halo ho orsamentu ne’e, ami propoen iha aumentu millaun rua hanesan ne’e. Totál hamutuk ho adisionál millaun $14, mas balun sei pendente hela hein para diskute fali tan”, Joaquim afirma iha Ministériu Finansas Aitarak-Laran, ohin.

Orsamentu ne’e ba programa Prioridade MAP nian mak hasa’e produsaun iha área agrikultura nian, reabilitasaun ba kafé no halo espansaun.  Iha pekuária no veterinária mak haree fali ba karau sira  nomós importante seluk mak floresta.

“Ida fali tan importante tebes mak peska, mas ita iha orsamentu uitoan de’it ba ida ne’e. Ami koko millaun $11 ida ne’e para hotu-hotu bele hetan”, katak.

Hatán kona-ba produsaun rai-laran ne’ebé menus, ministru ne’e dehan iha impaktu barak tanba serbisu agrikultura ne’e tenke iha bee, rai, maibé bainhira rai iha mas bee laiha ne’e problema.

“Daudaun ne’e iha fatór barak mak implika ba produsaun nian hanesan natar. Agora ita-nia ferik-katuas de’it maka serbisu natar, ita-nia joven sira latun bá natar ne’ebá. Ita-nia ferik-katuas sira mós agora lakohi tun ona bá tanba sira hetan subsídiu, sira sosa foos baratu duké bá natar, kole, di’ak liu sosa de’it, ne’e maka iha impaktu mós ba iha ne’e, mas ne’e la’ós razaun ba ita para labele serbisu, ita serbisu nafatin enkoraja joven sira para bele halai fali natar, tanba agrikultura ne’e buat ida lakotu, ita-nia moris tomak presiza hahán, ne’ebé tenke ekoraja fali joven sira investe iha agrikultura”.

Kona-ba tratór sira ne’ebé iha atu apoia serbisu liuliu atu hasa’e produsaun, ministru dehan MAP sei lahola ekipamentu foun, maibé tuir orientasaun Primeiru-Ministru nian katak uza nafatin ida ne’e no halo manutesaun de’it, mas atu sosa maka nia ferramenta sira de’it hanesan xarua para bele uza tanba ne’e ministériu prevee rihun $200 atu hola sasán  hodi suporta tratór sira ne’ebé iha.

Fontes: Timor Agora

HUSIK RESPOSTA