Masakre 12 Novembru Kontribui Hakotu Okupasaun Indonézia

0
365
12 de Novembru
     Timor Leste komemora Masakre 12 Novembru hodi hanoin hikas sofrimentu jiven lubuk ida iha tinan 28 liuba (1991), bainhira hetan atake husi Militar Indonézia hafoin halo’o manifestasaun husi Igreja Motaél to’o rate Santa Cruz.
   Vise-Xefe Bankada FRETILIN, Francisco Miranda Branco, konsidera loron istoriku ida-ne’e importante tebes ba povu tomak. “Masakre ida-ne’e kontribui no hakotu okupasaun Indonézia nian iha Timor. Joven sira hatudu istoria hosi ne’eba no hatudu katak iha faze istoria hotu joven importante ba determinasaun”, dehan Branco iha resintu Parlamentu Nasional (PN), segunda ne’e.
    Tuir nia, iha prosesu luta naruk hatudu katak joven sira ho aten brani luta kontra okupasaun. “Ita hotu tenke rekoñese loron ida ne’e hanesan loron importante. Agora kontinuasaun ba prosesu konstrusaun Estadu nian, ne’ebe joven determinante nafatin no sira kontinua esforsu hodi hetan kualidade diak iha setor edukasaun”, nia akresenta.
    Atu foin sae sira bele hetan asesu edukasaun ho kualidade, Deputadu Bankada Opozisaun ne’e husu Estadu no Governu tenke fo fasilidade hodi bele hetan sistema edukasaun ida ne’ebe diak liu ho kualidade aas, nune’e Timor Leste bele iha rekursu umanu ida ne’ebe kualidade iha futuru. Nune’e, reprezentante povu ne’e husu Governu hodi kria politika orsamental ida diak nune’e joven sira ne’ebe asesu ba edukasaun ho diak.
  Parte seluk, Deputadu Bankada CNRT, Domingos de Carvalho, konsidera Masakre 12 Novembru hanesan loron istoriku ne’ebe joven sira kontribui iha luta naruk. “Ita hotu hatene katak mundu internasional hatene masakre ida-ne’e maka loke dalan ba ita hodi hetan independensia. Nu’udar reprezentante povu valorize tebes loron ida ne’e ba Aswain sira”, subliña Deputadu Bankada Governu ne’e.
                   
Fontes: Tatoli.tl
Tr.: Hallo.tl
 

HUSIK RESPOSTA