Jogador Badminton Malaysia Lee Chong Wei pensiun : “Ha’u esforsu makas ona ba Nasaun”

0
72

Eis vensedor badminton mundu nian, Lee Chong Wei, desidi  pensiun husi mundu badminton depoizde diagnosa kona kankru inus.

Jogador prinsipal badminton Malaysia ne’e hatete susar atu foti desizaun hodi para halimar badminton.

“Ida ne’e desizaun ida ne’ebe susar tebes mai ha’u tamba hau hadomi los desportu ida ne’e,” hatete Lee.

“Ha’u laiha arependementu, importante liu mak hau nia saude,” nia hatete iha konferensia pers, kinta (13/06).

Konsege tanis, Lee para tiha koalia uitoan.

“Ha’u esforsu makas ba ha’u nia Nasaun. Ida ne’e ha’u nia loron pensiun,” hatete jogador badminton ne’ebe mak agora daudauk okupa iha pozisaun 191 mundu nian.

Aman husi oan nain rua ne’e diagnosa kona kankru inus stadiun inisiu, tinan kotuk. Depoizde halo tratamentu intensivu iha Taiwan, Lee afirma nia tratamentu ne’e konkluidu ona.

Maske nune’e, Lee labele ona tun ba mundu badminton tamba iha tratamentu ikus iha Taiwan april liu ba, doutor hatete ba nia tenki deskansa tamba “badminton presija treinu ho intensidade a’as”.

Depiozde pensiun, vensedor ba medalia prata Olimpiade ne’e  hatete hakarak pasa tempu ho nia fe’en.

“Ha’u kaben iha tinan 2012. Maibe ami nunka pasa tempu hamutuk. hau deve hela promesa (ba fe’en). Agora ha’u tenki halo nia kontenti.”

Lee termina nia kareira ho vitoria hamutuk 705 no titulu kampeaun hamutuk 69, hamutuk mos titulu all England no Superseries 47.

Lee nia kareira konsege halo kontroversaun wainhira nia hetan suspende temporariu husi organizasaun badminton mundu nian depoizde rezultadu teste doping hanesan ho kampeonatu mundial iha Kopenhagen, Agostus 2014 liu ba, hatudu katak nia pozitivu uza material anti inkamentu dexamethasone ne’ebe bandu labele uza.

Lee fo argumentu katak nia uza duni substansia ne’e tamba halo hela tratamentu selula tronku hodi kura nia kelen.

Xefi asosiasaun baminton Malaysia, Norza Zakaria, mensiona Lee hanesan legenda ida.

“Ida ne’e loron ida ne’ebe ke triste. Lee legenda ida ne’ebe mak ema fiar los. Ami simu nia desizaun,” hatete Norza ne’ebe mak marka hotu prezensa iha konferensia pers ne’e.”

Ministru desportu Malaysia, Syed Saddiq Syed Abdul Rahman, dehan Lee hanesan “Heroi ida ba Populasaun Malaysia”.

Nia hatete Lee sei simu pose hanesan xefi Kontingente Malaysia iha Olimpiade Tokyo 2020 oin mai.

Fontes : BBC Indonesia

Tr. : Hallo.tl

HUSIK RESPOSTA