Sai husi plenaria, Xanana husu deskulpa

0
517

Ministru Planeamentu no Investimentu Estratejiku (MPIE), Kayrala Xanana Gusmão, Kinta (23/6/2016), liu husi plenaria husu deskulpa ba reprezentante povu iha uma fukun Parlamentu Nasional (PN) tanba husik hela plenaria.

Iha Debate Lei ordenamentu Teritorial no Lei rai, Tersa (21/6/2016), eis Primeiru Ministru (PM), Kayrala Xanana Gusmão, husik hela plenaria no la fo hatene hela ba meja, maske membru PN sira hotu, inklui  membru Governu balun konsentra hela ba leitura lei ordenamentu teritorial no lei rai ne’ebe aprezenta husi Komisaun A PN.

 “Hau husu deskulpa iha loron  neba, tanba hau nia kabun moras oitoan,” esklarese Xanana Gusmão, bainhira debate iha jeneralidade pakote lei ordenamentu teritorial iha PN, horseik.

Maske Xanana sai husi plenaria, maibe nia nafatin akompanha diskusaun ba pakote lei tolu kompostu husi lei rai, lei ordenamentu teritorial no lei fundu kriasaun espropriasaun ne’e.

“Hau sai, tanba kabun moras, maibe ita boot sira le iha ne’e (red-plenaria), mais iha mos hau le hela, ne’ebe deputado Joaquim labele lori ba lia,” dehan lider karismatiku ne’e.

Iha diskusaun ba lei tolu ne’e, alem de partisipa husi MPIE Kayrala Xanana Gusmão, iham os  Ministru Obras Publikus, Transportes no Komunikasoens (MOPTK), Gastão de Sousa ho mos Sekretario Estado das Terras no Propriedades, Jaime Xavier Lopez.

Relatorio pareser ne’e le kuaze oras rua nia laran, bainhira deputado leitor sei le namanas, Ministru Xanana Gusmão, tanba lasatisfeito ho buat balu maka no tur kleur hodi rona leitura ne’ebe mak ho lian Portugues, entaun Ministru Xanana deside hodi sai husi Plenaria.

Tuir observasaun Diario nian iha sala plenaria nota katak, Ministru Xanana oin buis tebes no derepente deit hambirk husi nia tur fatin sai kedas mai liur no hakat sai kedas husi uma fukun Parlamentu Nasional.

Deputado Arão Noe, dehan katak, situasaun ne’e mosu normal, lapresija Ministru Xanana Gusmão atu akompanha to’o remata, tanba iha Ministru Obras Publikas, Gastão Sousa.

“Ne’e normal, parese ministru iha asuntus balu ne’ebe mak presija tebes nia atu hare lalais, ne’ebe ita labele foti ne’e ba kestaun,” klarifika Arão. Mia

HUSIK RESPOSTA