SE Nivio Fó Prazu Loron Haat ba Funsionariu Hatama Patrimoniu Estadu

0
66

Dili – Atu garante utulizasaun patrimoniu estadu ba duni interese estadu no povu. Sua Exelençia Sekretariu Estadu Juventude no Traballu, Nivio Leite Magalhaes, halo inspesaun ba patrimoniu estadu neebé durante ne’e funsionariu Sekretaria Estadu Juventude no Traballu uza.

SE Nivio halao prosesu inspesaun ba patrimoniu estadu hanesan karreta, motor, komputadór no seluk tan ne’ebé funsionariu SEJT sira uza. Inspesaun nee hala’o iha edifisiu SEJT, Kaikoli-Dili, Segunda (05/02/2018).

Sekretariu Estadu ne’e hatete, inspesaun ne’e halao tanba dezde nia simu mandatu nia observa katak funsionariu barak neebé simu patrimoniu estadu hanesan motor no karreta tama serbisu tarde bebeik.

Balun ne’ebé la simu (patrimoniu estadu) tama sedu. Ida nee hau hanoin injustisa boot ida, deklara SE Nivio hafoin halao inspesaun.

Tuir SE Nivio, funsionariu hothotu ne’ebé simu patrimoniu estadu atu uza hodi fasilita sira-nia servisu, maibé iha funsionariu balun fó fali patrimoniu ne’ebé sira simu ba ninia familia atu uza.

“Ha’u simu informasaun katak funsionariu balun simu tiha motor sira la utuliza maibé fó fali ba sira-nia familia mak uza. Ida nee labele. Motor neebé sira simu atu fasilita sira-nia servisu, tanba nee sira tenke utuliza ba sira-nia servisu laos atu rai fali iha uma,” dehan SE Nivio.

Hafoin hala’o inspesaun, SE Nivio identifika no rejistu motor 128, karreta 33, no komputadór 590.

Inspesaun ne’e laos de’it atu haree ekipamentus nee eziste ka lae, maibé aproveita oportunidade nee SE Nivio mós haree kondisaun ekipamentus ne’ebé iha.

“Ohin funsionariu balun hatete dehan seidauk bele lori mai tanba sei iha hela munisipiu no balun hatete dehan sei aat hela, tanba nee mak ha’u husu sira atu aprezenta relatoriu, laos de’it relatoriu eskrita maibé tenke hatudu mós ekipamentus ne’ebé sira simu,” dehan Sekretariu Estadu.

SE Nivio iha prosesu inspesaun identifika mós funsionariu balun ne’ebé hasai ona xapa matrikula estadu nian.

“Ohin (horsehik) ha’u husu ba sira atu hatudu motor ne’e para iha ne’ebé. Motor balun nia xapa matrikula ne’e sira hasai tiha. Ida nee ha’u hanoin ladun di’ak, no motor balun nia kondisaun at hela,” katak SE Nivio.

Ho realidade hirak ne’ebé identifika, SE Nivio fó prazu ba funsionariu sira ne’ebé durante ne’e uza patrimoniu estadu atu aprezenta iha Sesta (09/02/2018) semana ne’e.

“Ha’u fó tempu ba sira to’o Sesta-feira hothotu tenke hatama (patrimoniu estadu). Nia atu aat mós lori mai par ita haree nia at ne’e iha ne’ebé nunee bele hadia, halo manutensaun, tanba ekipamentu sira ne’e hanesan ha’u dehan ona ne’e povu nian, see de’it mak utuliza tenke utuliza ho loloos,” afirma SE Nivio.

Tuir SE Nivio, ema ne’ebé utuliza patrimoniu estadu tenke ho responsabilidade hanesan ninian rasik nune’e ekipamentu sira ne’e nia kondisaun di’ak nafatin.

“Labele bainhira utuliza tiha ita halo at depois bainhira (funsionariu) foun mai labele uza no tenke sosa foun, ida ne’e liga mós ba poupansa ba orsamentu estadu nian. Se ita sosa de’it maibé la utuliza didi’ak ida ne’e sei afeita mós ba gastus,” dehan SE Nivio.

Kona-ba sansaun, Sekretariu Estadu ne’e hatete, sei fó sansaun disiplinar ba funsionariu sira ne’ebé prova la hatudu responsabilidade ba patrimoniu neebé sira simu.

“Ha’u sempre hatete, tratamentu hanesan ba funsionariu hotu, laiha funsionariu espesial iha Sekretaria Estadu Juventude no Trabalho. See mak sala nia tenke hatan no responsabiliza. Labele sala tanba ita koñese malu ita perdua malu. Laiha perdua malu bainhira ita koalia kona-ba interese povu, interese estadu nian,” deklara SE Nivio.

“Utilizasaun ba Patrimonia Estadu tengki ho Responsabilidade, tamba fungsionario barak Persija tebes atu uza maibe Sidauk Hetan Oportunidade,” deklara SEJT, Nívio Magalhães ba nia fungsionario sira durante halao inspesaun ba kada Diresaun iha Edifisio Sejt, Kaikoli, Segunda-Feira (05/02/18).

Fontes : Facebook Gabinete do SEJT

HUSIK RESPOSTA