SEFOPE-STP BALI Asina Memorandu ba Formasaun iha Area Ospitalidade

0
242
Sekretariu Estadu Formasaun Profisional no Empregu, Julião da Silva (karuk) no Sekretariu Ezekutivu FDCH, Isménio Martins da Silva (loos) foto hamutuk iha serimónia asina MoU sobre Programa Estajiu iha Sekolah Tinggi Pariwisata Bali, iha Salaun SEFOPE kaikoli, Dili, Segunda (28/10/2019).
       
   Sekretariu Estadu Formasaun Profisional no Empregu (SEFOPE) asina memorandu entendimentu (MoU, iha ingles) ho Sekolah Tinggi Pariwisata Bali no Otél Novu Turizmu hodi apoia formasaun ba benefisiariu na’in-10 hodi prepara sira liga ba merkadu servisu iha area ospitalidade nian.
   Diretor Jeral SEFOPE, Paulo Alves, hateten orsamentu ba formasaun ne’e mai husi Orsamentu Jeral Estadu 2019 liuhusi Fundu Dezenvolvimentu Kapital Umanu (FDCH, sigla portugés) ho montante rihun $51 ho durasaun ba formasaun fulan neen.
   “Atu ita prepara joven timoroan sira liga mos ba industria servisu rai-li’ur nian. Ita servisu hamutuk ho Governu Australia no area ne’ebe ita haruka ba servisu mos iha ospitalidade nian. Durante ne’e ita-nia númeru seidauk barak ba servisu iha area ospitalidade iha Australia tanba ita seidauk bele halo’o kompetisaun ho nasaun sira Indo-Pasifiku”, Paulo Alves afima iha serimonia asinatura iha Kaikoli, ohin.
   Jerente Jeral Novu Turizmu, Clementino Gonçalves, hateten programa ida ne’e liuhusi estudu naruk ho bazeia ba hili ema na’in-10 atu tuir treinamentu iha Bali tuir area servisu ne’ebe Novu Turizmu presiza. “Maun-alin ne’ebe mak tuir formasaun ne’e, aprende didi’ak para lori matenek ne’e mai hodi hatutan fali ba maluk sira ne’ebe mak iha”, nia sujere.
   Hodi hatutan hafoin formasaun, formandu sira ne’e sei servisu iha Novu Turizmu tuir pedidu ne’ebe iha no Otél Novu Turizmu sente onradu hetan oportunidade ida ne’e.  Diretor Nasional Formasaun Profosional, Matues dos Santos Talo, salient programa ne’e liuhusi estajiu nasional no internasional nune’e SEFOPE liga ho parseiru sira oinsa mak bele simu graduadu husi sentru formasaun akreditadu, entaun Novu Turizmu sei fasilita hodi emprega direta benefisiariu bainhira remata ona estajiu iha Bali.
   “Ami taka ona informasaun iha midia oinsa mak bele halo’o prosesu rekrutamentu depois benefisiariu sira mai hatama dokumentu iha SEFOPE, prosesu selesaun ami sei entrega ba Novu Turizmu”, afirma. Tanba semana ne’e, halo’o ona prosesu selesaun husi Novu Turizmu hafoin finalize sei haruka benefisiariu sira ba Bali iha final novembru ne’e.
   Programa estajiu ne’ebe halo’o husi SEFOPE servisu hamutuk ho Novu Turizmu ho STP Bali ne’e, formandu timoroan sira sei ba aprende teoria fulan tolu no pratika mos fulan tolu. Diretor STP Bali, Dewa GN Byomantara, agradeses ba Governu Timor-Leste tanba fo fiar hodi eduka joven timoroan sira iha area ospitalidade liuliu iha otelaria, espesifiku liutan iha area tolu mak iha dapur, servidor, no housekeeping.
   Nia esplika sobre treinamentu ne’e, fulan tolu iha kampus no fulan tolu seluk sei halo’o estajiu iha otel sira. “Se ita koalia sobre Skill deit, ne’e sufisiente iha fulan tolu iha nivel baziku. Tanba ne’e hau husu ba ema sira ne’ebe rekruta joven sira ne’e atu fo prioridade liu iha attitude. Ema ne’ebe sei haruka ba Bali ne’e iha espiritu servidor ka lae? Ida ne’e mak difisil atu mai hanorin tanba presiza tempu, depois mak lingua ingles tanba iha turizmu ne’e labele husik husi lian internasional mak ingles ne’e no tuirmai mak aparensia”, nia sujere.
   Diretor ne’e haktuir, padraun edukasaun ne’ebe STP uza iha Indonesia ne’e tuir internasional nian no padraun dahuluk ne’ebe uza mak ASEAN ne’ebe ratifika ona, depois akredita ona husi institute edukasional iha London-Inglaterra, husi Universidade Vitoria iha Melbourne-Australia no mos akredita husi UNWTO ka Organizasaun Mundial Turizmu iha kualidade edukasaun turizmu nian.
   Asinatura memorandu ba formasaun ne’e husi SEFOPE, Julião da Silva, Sekretariu Ezekutivu FDCH, Isménio Martins da Silva, Jerente Jeral Novu Turizmu, Clementino Gonçalves, no Diretor STP Bali, I Wayang Sunarsa. Iha ambitu asinatura ne’e, Sekretariu Ezekutivu FDCH, Isménio Martins da Silva, hato’o parabens ba SEFOPE no pronto atu apoiu politika ida ne’ebe Sekretariu Estadu halo’o.
  Fontes: Tatoli.tl           Tr.: Hallo.tl    

HUSIK RESPOSTA