SEKOMS Hahú Prepara Esbosu Lei Regula Facebook

0
453

DILI, (TATOLI) – Sekrétariu Estadu Komunikasaun Sosiál, Mericio Juvinal dos Reis Akara, hateten ekipa jurídiku hahú prepara ona esbosu lei hodi regula utilizadór mídia sosiál Facebook atu lalebe halo defamasaun hasoru lideransa no seluk tan.

ʺEkipa SEKOMS hahú prepara draf lei para regula ema uza mídia sosiál  facebook, tanba agora ema uza sala hodi insulta, kria ID falsu, ataka ema ninia privasidadeʺ, hateten governante ne’e hafoin enkontru ho Asosiasaun Profesionál Teknolojia Informasaun no Komunikasaun (APTIK)  iha Palásiu Governu, ohin.

Konstituisaun RDTL artigu 40 no 41 garante liberdade espresaun, maibé iha ninia limitasaun, tanba ne’e esbosu lei ne’e importante atu ema uza mídia sosiál tuir regra.

ʺIta espresa ita nia diretu maibé ita viola ema seluk nia diretu entaun Governu iha dever atu regulaʺ, afirma Akara.

Nia dehan presiza mós kria lei cyber crime hodi regula krime iha komunikasaun teknolojia bainhira Timor-Leste moderniza ona teknolojia komunikasaun iha futuru.

ʺBainhira lei ne’e iha ona, sé mak la kumpre sei kona sansaun, tanba ita labele halo liberdade sem limiteʺ, realsa.

Ekipa jurídiku ne’e kompostu timoroan no estranjeiru. Esbosu ne’e sei halo konsultasaun ho públiku antes governu, parlamentu nasionál halo diskusaun no aprovasaun.

ʺIta sei halo konsultasaun públiku no públiku bele akompaña nafatin no ikus aprejenta ba Konsellu Ministru, Parlamentu no Prezidente Repúblikaʺ, akresenta.

Prezidente APTIK , Mauricio Freitas Soares, hateten prontu koopera ho governu hodi kria esbosu lei ne’e.

ʺIta tenke kria lei para regula teknolojia ne’e rasik, lei ne’e rasik atu salva vítima no suspeitu ne’ebé halo defamasaun iha mídia facebook, bainhira lei ne’e iha ona ami prontu atu halo sosializasaun ba públiku hodi intende lei ne’eʺ, katak nia.

Fontes : tatoli iha timor agora

HUSIK RESPOSTA