SJTL Kestiona Empregador Barak La Registu Iha INSS

0
298
Sekretario Jeral SJT-TL Almiro Villa Nova, empregador barak seidauk registu iha Institu Nasional Seguransa Sosial (INSS) no presisa governu halo sensibilizasaun ba empregador sira.
     
 Sindikatu Jeral Traballador Timor-Leste (SJT-TL) kestiona tanba sa mak empregador barak seidauk implementa kontribuisaun 6% salariu traballador sira nian ba sistema seguransa sosial Timor-Leste no tuir lei ne’ebe vigora tiha ona. Tuir Sekretario Jeral SJT-TL Almiro Villa Nova, empregador barak seidauk registu iha Institu Nasional Seguransa Sosial (INSS) no presisa governu halo sensibilizasaun ba empregador sira.
“Implementasaun konaba regimi kontribuitivu Institu Nasional Seguransa Sosial nian ohin loron ita hare katak setor privadu barak mak seidauk kumpri lei ida ne’e tanba seidauk involve nia traballador ho kompania iha seguransa sosial rasik,” nia haktuir. Nia dehan, kompania barak, laos kompanhia eskalaun kiik deit, maibe kompania mediu ba eskala boot barak mak seidauk rejistu iha INSS tanba sira hakarak evita kuntribui no gasta 6% refere husi salariu mensal taballador sira.
“Setor privado ho institusaun formal tanba ne’e mak ita husu INSS kontinua halo sensibilizasaun ba kompania hotu-hotu inklui setor formal, privado, nomos informal sira para involve ona sira nia kompania ho traballador iha institusaun ne’e rasik. Entau seguransa sosial rasik tenki halo sensibilizasaun ba empregador sira konaba osan 6% ne’e, atu nune’e la bele kria tan problema ba traballador Timoroan sira,” nia tenik.
Entretanto Membro Parlamento Nasional, Deputado Adriano do Nascimento katak sidadaun diak tenki kumpri lei, tenki kumpri hodi adapta aan ho lei ne’ebe iha, no mos nia hatete katak emprezariu sira mak tenki hatene rasik konaba ba leis ne’ebe vigora ne’ebe regula sira nia atividade, inklui kontribuisaun mensal 6% ba seguransa sosial nian. “Hau hanoin seguransa sosial nia kestaun mak ita foin aprende pengusah empresário, entau ita tenki hatene limitasaun oioin, mais nudar sidadaun iha nasaun ne’ebe demokratiku foin mak ukun tenki regula ita nia aan tuir regras e prosedimentu legal,” nia esplika tan.
Nia salienta tan katak tuir konstitusaun RDTL, kuandu lei iha ona, nudar sidadaun tenki halo tuir, no katak kestaun atu socializa ka la sosializa, la halo diferensa, tanba emprezario sira mak tenki iha insiativa rasik atu hatene no halo tuir lei nia rekezitus. “Hau hanoin kestaun Institutu Nasional Seguransa Sosial ne’e politika ida Estadu nian atu ajuda individu sidadaun Timoroan para aban baninhira nia pensaun la servisu ona, karik bele iha osan ruma hodi sustenta nia vida moris,” hatete tan deputadu Nascimento.
 
    Fontes: The Dili Weekly           Tr.: Hallo.tl

HUSIK RESPOSTA