Sriwijaya Air Moras Todan Pasajeiru Sira Hili Sae Aviaun Citilink

0
266
                           
Pasajeiru Sriwijaya Air, Nelson Estevano Moreira Maia, hatete, hanesan pasajeiru sente la seguru ho kondisaun aviaun Sriwijaya Air ne’ebé “moras todan” hodi labele star bainhira aviaun ne’e atu semo husi Denpasar-Bali mai Timor-Leste, nune’e halo pasajeiru sira tenke hein inklui pasajeiru balun tauk ba sa’e fali aviaun Citilink mai rai-laran hodi bele pasa feria Natal no tinan foun ho família sira. “Kondisaun aviaun a’at kedas iha Segunda ne’e, tanba kolega sira husi Bali atu mai Timor la konsege mai no iha Tersa ne’e mos akontese hanesan, bainhira ami pasajeiru sira sa’e hotu ona iha aviun laran derpenti deit sira haruka ami tun fila-fili tanba dehan aviaun ladiak, dehan Nelson Estevano Moreira Maia, ba JN-Diário, Kuarta (18/12/2019) iha Aeroportu Nicolau Lobato, Comoro Díli.
Nelson Estevano haktuir, sira pasajeiru hamutuk 188 mak sa’e ona iha aviaun laran no derepenti deit piloto haruka pasajeiru sira tun fali-fali hodi hein durante minutu 30, tanba aviaun refere labele star maibé depois tékniku husi Sriwijaya haree tiha kondisaun aviaun refere, piloto sira haruka pasajeiru sira atu sa’e fila-fali, maibé iha pasajeiru nain 64 mak hili lakohi atu sa’e aviaun refere, hodi husu atu sira transfere fali ba aviaun Citilink. “Ami lakohi mate tanba deit osan tikete 200 dolar amerikanu ne’e, maibé ida ne’ebé ami hakarak ne’e mak oinsa ami-nia vida durante voo, entaun ami haksesuk malu ho sira hodi husu sira halo atu transfere ami ba aviaun Citilink, ne’ebé osan ba tikete sira mak responsabiliza.”
Hatán ba preokupasaun ne’e, Branch Maneger Sriwijaya Air, Dirham Wahyudi, rekoñese iha duni loron 17 fulan ne’e aviaun Sriwijaya Air atrazadu kuaze oras 3 husi Díli ba Denpasar, tanba iha fallansu oituan no aviaun labele strating sistematikamente tuir sistema ne’ebé iha maibé tenki manual ho nune’e pilotu deside atu aviaun ne’e labele semo no tenki fila fali ba para fatin hodi halo chek-up husi tékniku sira. “Iha pasajeiru hamutuk 188 mak iha aviaun laran, tanba iha fallansau oituan mak piloto deside hodi la semo no haruka pasajeiru sira tun husi aviaun hodi hein minutu 30, nune’e tékniku sira bele haree hafoin ne’e iha tuku 12 liu minute 30, kapitaun husu ba pasajeiru sira atu boarding fila fali tanba kondisaun aviaun diak ona,” dehan Branch Maneger Sriwijaya Air.
Dirham Wahyudi afirma, husi pasajeiru 188 ne’e so 123 deit maka hakarak sa’e fila fali aviaun no kuaze pasajeiru 64 lakohi sa’e aviaun ho razaun tanba tauk, maibé pilotu mos lakohi lori aviaun se karik ho kondisaun ladiak. Nia dehan, husi pasajeiru sira ne’ebé lakohi sa’e aviaun Sriwijaya Air iha balun maka provoka hodi influensia fali pasajeiru sira seluk atu labele sa’e aviaun,. Ho ida ne’e pasajeiru sira ne’ebé iha aviaun laran tenki hein fali sira nain 64 sira ne’ebé lakohi sa’e no sira husu atu hatun hikas sira nia bagasi, entaun ho sitausaun ida ne’e tenke hasai pasajeiru idak-idak nia bagasi, no ida ne’e han oras kauze oras ida ho balun.
Nune’e mos, Ministru Transporte no Komunikasaun (MTK), José Agustinho hatete, kazu aviaun Sriwijaya Air ne’ebé labele voo iha loron Segunda no Tersa ho razaun tékniku, parte MTK simu ona informasaun hodi fo ona orientasaun ba Autoridade Aviaun Sivil (AAS) atu bolu parte aviaun Sriwijaya hodi fo klarifikasaun razaun saida mak aviaun refere labele voo husi Denpasar mai Timor. “Atu solusiona asuntu ne’e, ita iha aviaun Citilink ne’ebé bele handle atu fasilita pasajeiru sira no ita espera pasajeiru sira bele viajen ho diak hodi mai Timor, entaun kona-ba asuntu ida ne’e ami sei haree oinsa mak atu asegura seguransa ba vida pasajeiru sira nian, mak MTK iha ona alternativu iha tempu badak sei iha aviaun seluk, ne’ebé sei halo bele ajuda fasilita pasajeiru sira,”subliña Ministru MTK.
José Agustinho realsa, MTK sei haree kondisaun aviaun Sriwijaya nian karik la seguru atu bele voo hodi fo ameasa ba vida pasajeiru, mak MTK sei buka solusaun hodi solusiona tiha problema ne’e. Antes ne’e eis Prezidente Repúblika, José Ramos Horta, hatete, aviaun Sriwijaya ne’e naok povu Timor-Leste arbiru. Tanba ne’e nia husu Estadu atu kria lei aviasaun ona.
Fontes: Sekundo.tl
 
 

HUSIK RESPOSTA