Treinador hosi selesaun timoroan lamenta atrazu iha obra sira iha estádiu Díli nian

0
51
Japanese Bhutan's head coach Norio Tsukitate speaks during a press conference in the Qatari capital Doha, on September 2, 2015, a day ahead of a match against Qatar for the Asia Cup 2019 and 2018 World Cup qualifying matches. AFP PHOTO / AL-WATAN DOHA / KARIM JAAFAR ==QATAR OUT== (Photo by KARIM JAAFAR / AL-WATAN - DOHA / AFP)

Treinador hosi selesaun futebol timoroan, japunés Norio Tsukitate, konsidera katak atrazu iha obra sira iha Estádiu Munisipal Díli nian, ne’ebé impede nasaun hodi simu jogu internasional sira dezde tinan 2015, afeta daudaun prestasaun hosi jogador sira.

Tsukitate ko’alia ba jornalista sira iha Malázia hafoin lakon maka’as no konsekutivu dala rua hosi selesaun timoroan hasoru ekipa malaiu iha ronda hosi kualifikasaun ba Tasa Aziátiku, no jogu ida tuir loloos tenki halo iha Díli.

Hafoin lakon tiha 7-1 iha jogu dahuluk, timoroan sira lakon ona iha jogu daruak ho 5-1, halo treinador hatudu nia iritasaun ba situasaun ekipa nian ne’ebé maski iha esforsu laiha esperiénsia sufisiente.

“Ha’u hanesan treinador durante tinan ida no ha’u halo beibeik apelu ba federasaun hodi rezolve problema sira hodi nune’e ami bele joga iha uma. Maibé hanesan komplikadu no ha’u hahú kolen tanba husu beibeik”, nia hatete.

Treinador konsidera katak jogador sira halo sala barak tanba falta esperiénsia no hatete katak esperiénsia hodi joga iha uma hanesan importante.

Hafoin lakon iha jogu dahuluk, Tsukitate kesar ona kona-ba konsumu álkol ne’ebé aas iha jogador timoroan sira nune’e halo nia la uza atleta oioin ne’ebé maka iha esperiénsia.

“Hanesan susar hili jogador sira iha Timor-Leste tanba liga doméstika halo de’it durante fulan lima ka fulan neen no hafoin ne’e sira la halo buat ida. Sira hemu no la halo treinu. Tanba ne’e, balun laiha kondisaun ne’ebé di’ak”, nia refere.

Sekretáriu Estadu ba Juventude ho Desporto, Nélio Isaac, admiti ona ba Lusa preokupasaun ho situasaun hosi projetu, ne’ebé hahú ona hosi nia antesesor iha Governu konstitusional daneen, iha tinan 2015, no seidauk hotu.

“Ami presiza estádiu hodi iha jogu internasional sira no hosi Liga Futebol Amador. Maibé iha problema balun ne’ebé presiza atu rezolve”, nia esplika.

Tuir Isaac, problema ne’e iha ligasaun ho desizaun hosi empreza hodi hili atu hahú obra adisional sira ba projetu inisial lahó konklui obra sira hosi kontratu orijinal, nune’e halo atrazu iha obra sira no hamosu problema sira iha pagamentu ba obra sira ne’ebé hala’o tiha ona.

“Serbisu ne’e tuir loloos demora máximu tinan ida maibé hafoin ne’e la’o neineik tanba empreza la halo serbisu ho baze iha kontratu orijinal maibé halo obra adisional sira seluk”, nia refere.

“Empreza tuir loloos hakotu obra dahuluk sira iha kontratu orijinal. Halo ona obra adisional sira ne’ebé maka seidauk selu”, nia hatutan no esplika katak empreza simu ona 30% resin hosi valor kontratu nian.

Responsável timoroan esplika katak tanba konfuzaun kona-ba projetu maka nia lori ona ba primeiru-ministru, Taur Matan Ruak, ne’ebé husu ona ba Inspesaun Jeral Estadu nian “hodi investiga saida maka akontese”.

“Ami hein hela rezultadu”, nia afirma.

Atrazu sira iha obra sira Estádiu nian hetan debate pontualmentu iha Timor-Leste ho krítika sira hasoru atrazu sira iha obra ne’ebé lori ona tema ne’e ba parlamentu.

Dokumentu sira ne’ebé maka Lusa hetan konfirma katak projetu reabilitasaun Estádiu nian, iha folin dolar millaun 1,64, konfere ona ba empreza Marino Entreprises Lda iha loron 19 Abril 2016.

Projetu inklui renovasaun hosi edifísiu bankada nian, konstrusaun ba hariis-fatin sira, sala eletrisidade nian no poste iluminasaun, aleinde fornesimentu ba kadeira sira ba bankada, ho durasaun ne’ebé kalkula ba obra hamutuk loron 196.

Maibé, liutiha tinan tolu, obra sira hanesan paradu iha klaran no maski estádiu simu jogu balun hosi kompetisaun nasional sira, estádiu la kumpri nafatin kritériu internasional sira ne’ebé eziji.

Atrazu iha obra sira hanesan polémiku foun ne’ebé maka afeta futebol timoroan.

Iha tinan 2017, FIFA aumenta, iha nível mundial, kastigu ida ne’ebé fó hosi Komisaun Disiplinar hosi Konfederasaun Aziátiku Futebol (CAF) nian ba sekretáriu-jeral hosi Federasaun Futebol Timor-Leste nian, kulpadu uza dokumentu falsu sira hodi regulariza jogador brazileiru sira.

Iha loron 20 Janeiru tinan hanesan, Konfederasaun Aziátiku Futebol (CAF) suspende ona Timor-Leste hosi edisaun tinan 2023 hosi Tasa Aziátiku hafoin konprova katak federasaun timoroan uza ona jogador brazileiru na’in 12 ho dokumentu nasionalidade falsu.

Iha Jullu tinan hanesan, CAF suspende ona, durante moris tomak, antigu diretor tékniku hosi Asosiasaun Futebol Timor-Leste nian, Orlando Marques Henriques, hosi atividade tomak ne’ebé iha relasaun ho futebol.

Desizaun mosu hafoin prova tiha katak Orlando Marques Henriques aseita subornu ida ho dolar rihun 15 hodi oferese ba jogador sira hosi ekipa futebol Timor-Leste nian, hodi nune’e lakon ho jogu hasoru Malázia, ne’ebé halo iha loron 30 Maiu, iha Jogu sira hosi Sudeste Aziátiku tinan 2015 nian, iha Singapura.

Iha final tinan 2017, Komité Disiplinar FIFA nian fó ona kastigu ba selesaun futebol Timor-Leste nian ho lakon hitu iha kualifikasaun ba Mundial2018, tanba jogador sira ne’ebé la eleitu, nune’e mós multa ida hamutuk rihun 70 franku suisu (euro rihun 60 resin).

Fontes : Sapo.tl

HUSIK RESPOSTA